ކުރިއަރ އަދި ވައިގެ މަގުން ރާއްޖެއެތެރެކުރަން އުޅުނު 17 މިލިއަން ރުފިޔާގެ މަގުމަތީ އަގުހުރި މަސްތުވާތަކެތި ކަސްޓަމްސްއިން އަތުލައިގެންފި.

06 ޖޫން 2024

ކުރިއަރ އަދި ވައިގެ މަގުން ރާއްޖެއެތެރެކުރަން އުޅުނު 17 މިލިއަން ރުފިޔާގެ (މަގުމަތީ އަގު) މަސްތުވާތަކެތި ކަސްޓަމްސްއިން އަތުލައިގަނެފިއެވެ.

މިތަކެތި އަތުލައިގަނެފައިވަނީ އެޕްރީލް އަދި މެއި މަހުގެ ތެރޭގައި ވައިގެ މަގުން އައިސްފައިވާ ފަސިންޖަރުން އަދި ކުރިއަރ މެދުވެރިކޮށް ރާއްޖެއަށް ގެނެސްފައިވާ ޕާރުސަލުތައް ބަލައިފާސްކުރުމުގެ ތެރޭގައި ޝައްކުކުރެވޭ ޒާތުގެ ބާވަތްތަކެއް ހުރުމުން، އިތުރަށް ބަލާ ފާސްކުރުމުގެ ތެރޭގައެވެ. މިގޮތުން ތަފާތު 4 މައްސަލައެއްގައި މަސްތުވާތަކެތި ކަމަށް ޝައްކުކުރެވޭ ތަކެތި ފެނިފައިވާއިރު، މި ތަކެތި ފުރަތަމަ މަރުހަލާގައި ކަސްޓަމްސް އިން ތަހްލީލް ކުރުމުން މަސްތުވާތަކެތީގެ ބާވަތްތައްކަމަށްވާ ސިންތެޓިކް ކެތިނޯން (Synthetic Cathinone) ، ކޮކެއިން (Cocaine)، އަދި ހެރޮއިން (Heroin) އަށް ވަނީ ޕޮޒިޓިވް ވެފައެވެ. މި މައްސަލަތަކުގެ އިތުރު ތަފްސީލް ތިރީގައި އެވަނީއެވެ.

• 02 އޭޕްރީލް 2024 ގައި ވައިގެމަގުން / ފަސިންޖަރެއްގެ ލަގެޖުން 5،670 ގްރާމްގެ ކޮކެއިން ފެނިފައިވޭ، މިތަކެތީގެ މަގުމަތީ އަގު 14,000,000.00 (ސާދަ މިލިއަން) ރުފިޔާ އަށް އަރައެވެ.


• 09 އޭޕްރީލް 2024 ގައި ކުރިއަރ މަގުން 180 ގްރާމްގެ ސިންތެޓިކް ކެތިނޯން ފެނިފައިވޭ، މިތަކެތީގެ މަގުމަތީ އަގު 324,000.00 (ތިންސަތޭކަ ސައްވީސްހާސް) ރުފިޔާ އަށް އަރައެވެ.


• 05 މެއި 2024 ގައި ކުރިއަރ މަގުން 1,690 ގްރާމްގެ ސިންތެޓިކް ކެތިނޯން ފެނިފައިވޭ، މިތަކެތީގެ މަގުމަތީ އަގު 3,042,000.00 (ތިން މިލިއަން ސާޅީސްދެ ހާސް) ރުފިޔާ އަށް އަރައެވެ.


• 25 މެއި 2024 ގައި ވައިގެމަގުން / ފަސިންޖަރެއްގެ ހަށިގަނޑުން 300 ގްރާމްގެ ހެރޮއިން ފެނިފައިވޭ، މިތަކެތީގެ މަގުމަތީ އަގު 360,000.00 (ތިންސަތޭކަ ފަސްދޮޅަސް ހާސް) ރުފިޔާ އަށް އަރައެވެ.

           މި މައްސަލަތަކުގައި އަތުލައިގަނެވުނު މަސްތުވާތަކެތީގެ ބަރުދަނުގައި ޕެކިންއާއި އެކު ޖުމްލަ 7.840 ކިލޯގުރާމް ހުރިއިރު، މިތަކެތީގެ މަގުމަތީ އަގަކީ  17,726,000.00 (ސަތާރަ މިލިއަން ހަތްލައްކަ ސައްބީސް ހާސް) ދިވެހި ރުފިޔާކަމަށް ލަފާކުރެވެއެވެ.

މި މައްސަލަތައް އިތުރަށް ތަޙްޤީޤްކުރުމަށްޓަކައި، މައްސަލަތަކުގައި ޝާމިލްވާ ފަރާތްތައް އަދި އަތުލައިގަނެވުނު މަސްތުވާތަކެތި މިހާރު ވަނީ ދިވެހި ފުލުހުންގެ ޚިދުމަތާއި ހަވާލުކުރެވިފައެވެ.