ކަނޑު އުޅަނދުފަހަރު
އިންވާރޑް ކްލިއަރެންސް
ދިވެހިރާއްޖެއަށް އެތެރެވާ ހުރިހާ އުޅަނދުފަހަރަކުން ރާއްޖެއަށް އައުމުގެ ކުރިން އިންވާރޑް ކްލިއަރެންސް ހޯދަންޖެހޭނެއެވެ. އަދި އުޅަނދުގެ އެޖެންޓެއްގެ ގޮތުގައި މާލޭގައި މީހަކު ކަނޑައެޅިފައި ހުންނަންޖެހޭނެއެވެ. އެއްވެސް ސަބަބަކާއިހުރެ އުޅަނދު ރާއްޖެއަށް އަންނައިރު މިއިން ކަމެއް ފުރިހަމަ ނުވާކަމުގައިވާނަމަ، ވީއެޗްއެފް ޗެނަލް 16 މެދުވެރިކޮށް ކަސްޓަމްސްއަށް އެކަން އަންގަންވާނެއެވެ. އަދި އުޅަނދު ރާއްޖެއަށް އައުމަށްފަހު 48 ގަޑިއިރުގެ ތެރޭގައި އެޖެންޓެއް ހަމަޖައްސަންޖެހޭނެއެވެ. ޑިޕްލޮމެޓިކް ބޭނުންތަކަށް އަންނަ އުޅަނދުތައް ފިޔަވައި އެހެން އުޅަނދުތަކަށް އިންވާރޑް ކްލިއަރެންސް ލިބޭނީ ތިރީގައިވާ ތަންތަނުން އެޖެންޓަށް ހުއްދަ ލިބުނީމައެވެ.
- ކޯސްޓް ގާރޑް
- ޕޯޓް ހެލްތު، ޑިޕާރޓްމެންޓް އޮފް ޕަބްލިކް ހެލްތު
- މޯލްޑިވްސް އިމިގްރޭޝަން
ކަސްޓަމްސްގެ އޮފީސްތައް ނުހުންނަ ރަށްރަށުގައި އިންވާރޑް ކްލިއަރެންސް ދޭނީ އެ ރީޖަނެއްގެ ކަސްޓަމްސް ޑިއުޓީގައި އިން އޮފިސަރަކު ނުވަތަ އަތޮޅު ކައުންސިލުންނެވެ،
ރާއްޖެއިން ބޭރުން އަންނަ އުޅަނދުފަހަރު މާލެ ނޫން އެހެން ބަނދަރަކަށް ދާނަމަ މިނިސްޓްރީ އޮފް ޑިފެންސް އިން ހުއްދަނަގަންޖެހޭނެއެވެ.
ހުށަހަޅަންޖެހޭ ލިޔެކިޔުންތައް
- ލާސްޓް ޕޯޓް ކްލިއަރެންސްގެ އަސްލު
- ފަސިންޖަރުންނާއި ކުރޫއިންގެ ލިސްޓް
- ކުރޫ ޑިކްލަރޭޝަން
- ކުރޫއިންގެ ޕާރސަނަލް އިފެކްޓްސް ލިސްޓް
- ޝިޕް ސްޓޯރ
- ބޮންޑް ސްޓޯރ ލިސްޓް
- ޓްރާންސިޓް ކާރގޯ މެނިފެސްޓް
- ޕޯޓް އޮފް ކޯލް ނުވަތަ ވޮޔޭޖް މެމޯ
- އެމް.އެން.ޑީ.އެފް ސެކިއުރިޓީ ކްލިއަރެންސްގެ ކޮޕީ
- ޖެނެރަލް ޑިކްލަރޭޝަން
- އަލަށް އިންވާރޑް ކްލިއަރެންސް ހޯދާ އުޅަނދެއްނަމަ، އުޅަނދުގެ ފޮޓޯ އަދި ސްޕެސިފިކޭޝަން ހުށަހަޅަންވާނެއެވެ.
އައުޓްވާރޑް ކްލިއަރެންސް
ކަަސްޓަމްސްގެ އާންމު ގަވާޢިދުގެ ޖަދުވަލު 69 ގައިވާ ގޮތުން ދިވެހިރާއްޖެއިން ބޭރަށް ކަނޑުމަގުން ނުވަތަ ވައިގެމަގުން ފުރާ ކޮންމެ އުޅަނދެއް ފުރުމުގެ ކުރުން އައުޓްވާރޑް ކްލިއަރެންސް ހޯދަންޖެހޭނެއެވެ.
ހުށަހަޅަންޖެހޭ ލިޔެކިޔުންތައް
- ޖެނެރަލް ޑިކްލެރޭޝަން އަދި ކުރޫ ލިސްޓް ( ޕޯޓް ހިންގާ ފަރާތް، މޯލްޑިވްސް އިމިގްރޭޝަން އަދި ޕޯޓް ހެލްތުން ތަތްގަނޑުޖަހާފައި)
- އެމް.އެން.ޑީ.އެފް ސެކިއުރިޓީ ކްލިއަރެންސްގެ އަސްލު
- ބަނދަރު ހިންގާ ފަރާތުން ދޫކުރާ ޕޯރޓް ކޮންޓްެރޯލް ޕާރމިޓް
- އުޅަނދުގައި އެއްވެސް މުދަލެއް ހުރި ކަމުގައިވާނަމަ، ކަސްޓަމްސް ވެލުއޭޝަން އެންޑް ޑޮކިއުމެންޓޭޝަން އިން ތަތްގަނޑު ޖަހާފައިވާ ކާރގޯ މެނިފެސްޓް
- ފައިސާ ދެއްކި ރަސީދު
- އައުޓްވާރޑް ކްލިއަރެންސް ދޭތާ 24 ގަޑިއިރުތެރޭގައި އުޅަނދަށް ނުފުރިއްޖެނަމަ، ރީ-އެޕްލިކޭޝަން ބޭނުންވާނެއެވެ.
- ރާއްޖޭގައި އުޅަނދު މަޑުކުރާ މުއްދަތުގެ ތެރޭގައި ޕޯޓް އެންކަރޭޖް އޭރިއާއަށް އުޅަނދު ނުވަންނަ ކަމުގައިވަނީނަމަ، ޖެނެރަލް ޑިކްލަރޭޝަން އަދި ކުރޫ ލިސްޓުގައި ބަނދަރު ހިންގާ ފަރާތުގެ ތަތްގަނޑު ޖަހާކަށް ނުޖެހޭނެއެވެ. އަދި ބަނދަރު ހިންގާ ފަރާތުން މިއުޅަނދުތަކަށް ޕޯރޓް ކޮންޓްރޯލް ޕާރމިޓް ދޫކުރާކަށް ނުޖެހޭނެއެވެ.
އައުޓްވާރޑް ކްލިއަރެންސް ދޫކުރާ ބަނދަރުތައް
- މާލޭ ވިޔަފާރި ބަނދަރާއި، އެބަނދަރުގެ އެންކަރޭޖް އޭރިއާ
- ސ.ހިތަދޫ ވިޔަފާރި ބަނދަރާއި، އެބަނދަރުގެ އެންކަރޭޖް އޭރިއާ
- ހދ.ކުޅުދުއްފުށި ވިޔަފާރި ބަނދަރާއި، އެބަނދަރުގެ އެންކަރޭޖް އޭރިއާ
- ހއ.އުލިގަމް ޔޮޓް ހާބަރު (ހަމައެކަނި ޓޫރިސްޓު އުޅަނދުފަހަރަށް)